फत्तेपुर बहुउद्देश्यीय सहकारीको २०औँ वार्षिक साधारण सभा सम्पन्न

कैलाश माझु,सप्तरी : श्री फत्तेपुर बहुउद्देश्यीय सहकारी संस्था लिमिटेडको २०औँ वार्षिक साधारण सभा आज मिति २०८२ साल पौष ९ गते बुधबार सप्तकोशी नगरपालिका–१ अन्तर्गत सोमबारे तथा शुक्रबार हटिया स्टल, शान्तिनगरमा भव्य रूपमा सम्पन्न भएको छ।

सभामा संस्थाले आर्थिक वर्ष २०८१/०८२ को वार्षिक कारोबार प्रतिवेदन प्रस्तुत गर्दै आर्थिक वर्ष २०८२/०८३ को अनुमानित वार्षिक बजेट समेत पारित गरेको छ।

कार्यक्रमको अध्यक्षता संस्थाका संचालक समितिका अध्यक्ष श्री प्रेमकुमार दाहालले गर्नुभएको थियो भने संघीय सरकारका पूर्व युवा तथा खेलकुद मन्त्री श्री सत्यनारायण मण्डल प्रमुख अतिथिको रूपमा सहभागी हुनुहुन्थ्यो।

विशिष्ट अतिथि तथा अतिथिहरूको उल्लेखनीय उपस्थिति
कार्यक्रममा सप्तकोशी नगरपालिकाका नगर प्रमुख श्री कृष्णप्रसाद ढकाल, निवर्तमान नगर प्रमुख श्री उत्तमकुमार शर्मा, जिल्ला सहकारी संघका अध्यक्ष श्री विनोदकुमार दत्त, बहुउद्देश्यीय जिल्ला सहकारी संघका अध्यक्ष श्री विश्वनाथ न्यौपाने, राष्ट्रिय सहकारी बैंकका प्रतिनिधि, विभिन्न राजनीतिक दलका नगर तहका अध्यक्ष तथा प्रतिनिधिहरू, वडा अध्यक्षहरू, नगर कार्यपालिका सदस्यहरू, सहकारी अभियन्ता, समाजसेवी, पत्रकार तथा ठूलो संख्यामा शेयर सदस्यहरूको उपस्थिति रहेको थियो।

कार्यक्रम सञ्चालन र औपचारिक गतिविधि

कार्यक्रमको सञ्चालन संस्थाका व्यवस्थापक श्री दयाराम भट्टराईले गर्नुभएको थियो।
कार्यक्रममा राष्ट्रिय गान, दिवंगत शेयर सदस्य तथा सहिदप्रति १ मिनेट मौनधारण, पानसमा दीप प्रज्वलन गरी सभाको औपचारिक उद्घाटन गरिएको थियो।

पुरस्कार तथा सम्मान

२०८१ सालको एसईई परीक्षामा उत्कृष्ट अंक ल्याउने विद्यार्थीहरूलाई सम्मान गरिएको थियो। सम्मानित विद्यार्थीहरूमा:
रोहन महत (वडा नं. ४)
सबिना श्रेष्ठ (वडा नं. ३)
सेविना खड्का (वडा नं. १)

त्यसैगरी संस्थाका उत्कृष्ट शेयर सदस्यहरू:

कृष्णप्रसाद ढकाल
शम्भुराज राई
सुजता अधिकारी
गीता देवी साह
अशोकप्रसाद रौनियार
लाई सम्मान गरिएको थियो।

प्रतिवेदन र मन्तव्य

संस्थाको वार्षिक प्रतिवेदन अध्यक्ष श्री प्रेमकुमार दाहालले प्रस्तुत गर्नुभएको थियो। कार्यक्रममा सहकारी, शेयर सदस्य तथा स्थानीय जनप्रतिनिधिहरूको तर्फबाट शुभकामना मन्तव्य व्यक्त गरिएको थियो।

समापन

प्रमुख अतिथि पूर्व मन्त्री श्री सत्यनारायण मण्डल तथा नगर प्रमुख श्री कृष्णप्रसाद ढकालले सहकारीको भूमिकालाई स्थानीय विकाससँग जोड्दै पारदर्शिता, अनुशासन र सदस्य हितमा आधारित सहकारी अभियानलाई थप मजबुत बनाउनुपर्ने धारणा व्यक्त गर्नुभयो।

अध्यक्षको समापन मन्तव्यसँगै उद्घाटन सत्र समाप्त भई बन्द सत्रमा प्रवेश गर्दै २०औँ वार्षिक साधारण सभा सफलतापूर्वक सम्पन्न भएको घोषणा गरिएको थियो।