सप्तकोशी–११ मा जेष्ठ नागरिकप्रति सम्मानको उदाहरणीय अभ्यास, ३०० जनालाई न्यानो सिरक वितरण

कैलाश माझी,सप्तरी : सप्तरीको सप्तकोशी नगरपालिका वडा नं. ११ को कार्यालय भगनी, मलेठले आज १६ गते शुक्रवार जेष्ठ नागरिकहरूको सम्मानमा उदाहरणीय कार्यक्रम सम्पन्न गरेको छ। वडा कार्यालयको आयोजनामा सम्पन्न उक्त कार्यक्रममा ६० वर्ष उमेर पूरा गरेका जेष्ठ नागरिकहरूलाई सम्मानसहित न्यानो सामग्री वितरण गरिएको हो।

जेष्ठ नागरिकहरू समाजका अमूल्य अनुभव, ज्ञान र संस्कारका संवाहक भएको मान्यतालाई आत्मसात गर्दै वडा कार्यालयले पूर्वनिर्धारित मिति, समय र स्थानमा कार्यक्रम आयोजना गरेको थियो। कार्यक्रममा सहभागी हुन लाभग्राही जेष्ठ नागरिकहरूलाई आवश्यक कागजातसहित उपस्थित हुन वडा कार्यालयले अग्रिम सूचना जारी गरेको थियो।

सामाजिक सुरक्षा भत्ता खाइपाई आएका ६० वर्ष उमेर पूरा गरेका जेष्ठ नागरिकहरूलाई भत्ता कार्डका आधारमा कार्यक्रममा समावेश गरिएको थियो भने सामाजिक सुरक्षा भत्ता नखाने तर ६० वर्ष उमेर पूरा गरेका जेष्ठ नागरिकहरूलाई समेत समान अवसर दिइएको थियो। यसैक्रममा सामाजिक सुरक्षा भत्ता नखाने ६० वर्ष उमेर पूरा गरेका करिब ३०० जना जेष्ठ नागरिकलाई एक–एक थान फाइबरको सिरक वितरण गरिएको वडा कार्यालयले जनाएको छ।

कार्यक्रमलाई सम्बोधन गर्दै वडा नं. ११ का वडाध्यक्ष डोलेश्वर खड्गाले जेष्ठ नागरिकहरू बिना समाजको इतिहास अधुरो हुने उल्लेख गरे। उनले भने, “आज हामी जहाँ छौँ, त्यहाँसम्म पुग्नुमा जेष्ठ नागरिकहरूको त्याग, श्रम र अनुभवको ठूलो योगदान छ। उनीहरूको सम्मान गर्नु हाम्रो दायित्व मात्र नभई कर्तव्य हो।” वडाध्यक्ष खड्गाले जेष्ठ नागरिकको सम्मान, संरक्षण र जीवनस्तर सुधारलाई वडा कार्यालयको प्राथमिकतामा राखेर आगामी दिनमा पनि यस्ता कार्यक्रमहरू निरन्तर सञ्चालन गरिने प्रतिबद्धता व्यक्त गरे।

उनका अनुसार स्थानीय सरकार नागरिकको सबैभन्दा नजिकको सरकार भएकाले जेष्ठ नागरिक, अपाङ्गता भएका व्यक्ति, एकल महिला तथा विपन्न वर्गलाई लक्षित कार्यक्रमहरूलाई प्रभावकारी ढंगले कार्यान्वयन गरिँदै आएको छ।

कार्यक्रममा सहभागी जेष्ठ नागरिकहरूले वडा कार्यालयले देखाएको सम्मान र सहयोगप्रति कृतज्ञता व्यक्त गरे। उनीहरूले यस्तो कार्यक्रमले जेष्ठ नागरिकको आत्मसम्मान बढाउनुका साथै स्थानीय सरकारप्रतिको भरोसा अझ मजबुत बनाएको प्रतिक्रिया दिएका छन्।

स्थानीय जनप्रतिनिधि, वडा कार्यालयका कर्मचारी, समाजसेवी तथा स्थानीयबासीहरूको उल्लेखनीय उपस्थितिमा सम्पन्न उक्त कार्यक्रमले सामाजिक उत्तरदायित्व, मानवीय संवेदना र स्थानीय शासनप्रति सकारात्मक सन्देश प्रवाह गरेको सहभागीहरूको भनाइ छ।