जनमत पार्टी सप्तरीका कोषाध्यक्ष नरेश अधिकारी जबर्जस्ती करणी तथा ठगी आरोपमा पक्राउ

राजविराज, असार २४।
कैलाश माझी : जनमत पार्टी सप्तरीका जिल्ला कोषाध्यक्ष नरेश अधिकारीलाई जबर्जस्ती करणी तथा ठगीसम्बन्धी आरोपमा प्रहरीले पक्राउ गरेको छ। उनीविरुद्ध पीडित पक्षबाट परेको जाहेरीका आधारमा कानुनी प्रक्रिया अघि बढाइएको जिल्ला प्रहरी कार्यालय सप्तरीले जनाएको छ।

प्रहरीका अनुसार सप्तरीको महादेवा गाउँपालिका–२ निवासी अधिकारीविरुद्ध जबर्जस्ती करणी र ठगीसम्बन्धी उजुरी दर्ता भएपछि उनी केही दिनदेखि सम्पर्कविहीन रहेका थिए। प्रहरीले विभिन्न स्थानमा खोजतलास तीव्र बनाएको र मंगलबार दिउँसो महादेवपट्टी क्षेत्रबाट उनलाई नियन्त्रणमा लिएको जनाएको छ।

जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक (डीएसपी) हेमराज घिमिरेका अनुसार पक्राउ परेका अधिकारीलाई आवश्यक कानुनी प्रक्रिया पूरा गरी अनुसन्धानका लागि हिरासतमा राखिएको छ। उनका अनुसार जाहेरीमा उल्लेख गरिएका आरोपहरूको सत्यतथ्य स्थापित गर्न प्रमाण सङ्कलन, सम्बन्धित पक्षसँग बयान तथा अन्य अनुसन्धानात्मक कार्य भइरहेको छ।

प्रहरीले नरेश अधिकारीविरुद्ध जबर्जस्ती करणी तथा ठगी कसुरमा मुद्दा दर्ता गरी सप्तरी जिल्ला अदालत, राजविराजबाट म्याद थप अनुमति लिएर थप अनुसन्धान अघि बढाएको जनाएको छ। अनुसन्धानको निष्कर्षका आधारमा आवश्यक कानुनी प्रक्रिया अगाडि बढाइने प्रहरीले स्पष्ट पारेको छ।

घटनापछि जिल्लाको राजनीतिक वृत्तमा समेत चर्चा सुरु भएको छ। जनमत पार्टीका जिल्ला तहका जिम्मेवार पदाधिकारीमाथि यस्ता प्रकृतिको आरोप लागेपछि स्थानीय स्तरमा विभिन्न प्रतिक्रिया देखिएका छन्। यद्यपि, यस विषयमा जनमत पार्टी सप्तरीले औपचारिक धारणा सार्वजनिक गरेको छैन।

प्रहरीले अनुसन्धान जारी रहेकाले आरोपसँग सम्बन्धित विषयमा अहिले नै निष्कर्षमा पुग्न नहुने बताएको छ। कानुनअनुसार अदालतबाट दोषी ठहर नभएसम्म पक्राउ परेका व्यक्ति आरोपित मात्र हुने भएकाले घटनाको अन्तिम सत्य अनुसन्धान र न्यायिक प्रक्रियाबाट नै टुङ्गो लाग्नेछ।