इनरुवाबाट ५.७५ ग्राम ब्राउन सुगरसहित दुई जना पक्राउ

इनरुवा, भदौ ६ गते ।

कैलाश माझी : सुनसरीको इनरुवा नगरपालिका–४ स्थित बसचोकबाट प्रहरीले लागूऔषध ब्राउन सुगरजस्तो देखिने पदार्थसहित दुई जनालाई पक्राउ गरेको छ।

जिल्ला प्रहरी कार्यालय सुनसरी र अस्थायी प्रहरी पोष्ट बसपार्क, इनरुवाबाट संयुक्त रूपमा खटिएको प्रहरी टोलीले शनिबार दिउँसो करिब २ बजे पूर्व–पश्चिम राजमार्गमा पश्चिमबाट पूर्वतर्फ आउँदै गरेको को २८ प १३५ नम्बरको मोटरसाइकललाई शंका लागेर रोकी चेकजाँच गरेको थियो।

मोटरसाइकल चालक सुनसरीको धरान उपमहानगरपालिका–५ बस्ने ४३ वर्षीय अर्जुन राई र पछाडि सवार सोही स्थानका ३३ वर्षीय प्रेमबहादुर राईलाई खानतलासी गर्दा उनीहरूको साथबाट लागूऔषध ब्राउन सुगरजस्तो देखिने पदार्थ ५.७५ ग्राम बरामद भएको प्रहरीले जनाएको छ।

बरामद पदार्थको तौल ५ ग्राम ७५० मिलिग्राम रहेको प्रहरीले जनाएको छ।

प्रहरीले दुवै जनालाई उक्त पदार्थ र प्रयोग गरिएको मोटरसाइकलसहित नियन्त्रणमा लिई जिल्ला प्रहरी कार्यालय सुनसरी, इनरुवामा ल्याएको छ।

घटनाबारे थप अनुसन्धान भइरहेको जिल्ला प्रहरी कार्यालय सुनसरीले जनाएको छ।